Капитенот на Манчестер Сити, Рубен Дијаш, наводно им порачал на своите агенти да му најдат нов клуб. Како што пренесуваат одредени извори, Португалецот смета дека е дојден моментот за нови предизвици, откако клубот го напушти Пеп Гвардиола.
Дијаш пристигна на „Етихад“ токму како голема желба на Гвардиола, под чија команда израсна во еден од најдобрите дефанзивци во Премиер лигата и во Европа. Португалецот потпиша за Сити во летото 2020 година за дури 71,6 милиони евра, испиша историја со клубот, а минатото лето доби и нов договор со важност до јуни 2029 година.
Сепак, сè се промени со заминувањето на Пеп Гвардиола, но и на неговиот најдобар пријател Бернардо Силва, од кого ја наследи капитенската лента. Наводно, неговите агенти ќе ги почнат преговорите со клубови како Реал Мадрид и Баерн Минхен, кои се споменуваат како потенцијални дестинации, а се додава дека во оваа трка сигурно ќе се вклучи и Пари Сен Жермен.
Познато е дека Реал Мадрид сака да ја засили стоперската позиција, но и дека Баерн и ПСЖ нема да пропуштат ваква ретка можност. Рубен Дијаш има 29 години, пред него се уште неколку врвни сезони, а играч од неговиот калибар на пазарот едноставно не се пропушта.
