Ветеранот Карлос Бака имаше свое шоу на последниот меч од третото коло во Лигата на Европа и со два гола и една асистенција го предводеше Вилјареал до убедлива победа од 4:0 против Макаби Тел Авив.
Последниот меч од третото коло заврши точно на полноќ, а доцнеше над еден час поради големото невреме. Силен дожд го потопи теренот на стадионот „Дела Серамика“, па дури беше неизвесно и дали ќе се игра.
Сепак, невремето сопре и мечот почна во 22.10 часот и заврши со убедлив триумф на шпанскиот тим.
Бака ги постигна првите два гола, потоа одлично му асистираше на Баена, па веднаш беше заменет, а потоа печат на високиот триумф на Жолтата подморница стави Нино со гол за прво место во И групата со максимален ефект од 9 бода.
