Најчудната фудбалска сезона во последните десетици години комплетно го наруши респоредот на натпревари поради Коронавирусот, но поголемиот дел од засегнатите национални федерации, клубови, вклучувајќи ги и ФИФА и УЕФА постојано прават планови како да се доигра сезоната.
Бомбардирани сме од информации за плановите на премиерлигашите, членовите на Серија А, Ла Лига, но и останатите таканаречени помали првенства како да се заврши прекинатата сезона.
Дури има и такви што ја прогласија фудбалската 2019/20 за завршена, а Белгија прогласи и првак, тоа е Бриж.
За разлика од нормалниот фудбалски свет, само Македонија си молчи и кај нас ниту ФФМ, ниту клубовите не покажаа ниту иницијатива, ниту имаат план и решенија за справување со кризата и датум(и) кога, како и дали ќе заврши сезоната.
Во макфудбалот има комплетен молк, а ситуацијата е таква и поради пропустите што ни се влечат речиси три децении. Здружение на прволигаши кај нас не функционира, па клубовите се однесуваат како ситуацијата да не ги засега и досега од нив нема ниту една реакција, прашање, желба да се проектира план за доигрување на сезоната.
Вардар си молчи, иако е најтрофеен клуб во државата и треба да биде авангарда, па ним им одговара сезоната да биде прекината и ако може да бидат прогласени за шампиони. Не дека не заслужија, играа одлично и првото место со 10 бода предност пред Силекс и 11 пред актуелниот првак Шкендија е апсолутно заслужено, но токму тие и најмногу треба да стравуваат од едно друго сценарио што исто така е можно. Да се прогласи крај на сезоната без првак, што ќе му наштети најмногу на 11-кратниот првак.
Силекс очекувано си молчи, на кратовци им одговара втората позиција и настап во Лигата на Европа, а незаинтересирано делуваат и прваците од Тетово. Шкендија веројатно го посакува второто сценарио, Македонија да прогласи крај на сезоната без шампион.
И на останатите клубови им одговара ваквата состојба и тоа е очигледно бидејќи реакција нема од ниту еден од десетте прволигаши. Разединети, без силно Здружение веќе 30-тина години им одговара ситуацијаа статус кво. Третото сценарио е некој да свири крај на сезоната, веројатно ФФМ, и никој да не испадне од Првата лига.
Фудбалската федерација на Македонија во овој и во сите останати претходни гарнитури се дистанцира од домашното првенство, со евтина реплика дека тие се задолжени за националните селекции и Првата лига не е баш нивен домен. Се вртиме во круг со децении, а молкот и сега е на сила во екот на епидемијата со Коронавирус.
