Велшкиот репрезентативец Том Локјер може да си замине без отштета од Чарлтон по испаѓањето на клубот од Чемпионшип во Лига 1 во Англија.
Локјер при потпишувањето на двегодишниот договор, лани во јуни, мислел и на евентуално испаѓање и заедно со агентот што го застапува инсистирале да има и клаузула според која, играчот може да си замине бесплатно ако Чарлтон не успее да опстане во Чемпионшип.
И токму тоа и се случи во првата сезона што стоперот роден во Кардиф ја играше за Чарлтон. Во последното коло им требаше еден бод против Лидс, но загубија на „Еланд роуд“ со 4:0 и испаднаа.
Локјер одигра 43 натпревари за клубот во сезоната што заврши вчера и беше меѓу најдобрите во Чарлтон. За него има интерес и од клубови од Премиер лигата, но најконкретни се Кардиф и Свонси, екипи кои ќе играат плејоф за третиот билет што води од Чемпионшип во најсилната англиска лига.