Раководството на Авеш објави дека прволигашот што веќе испадна нема да го игра мечот од последното коло во португалската Примеира против Портимонензе.
Авеш нема шанси за опстанок, а и егзистенцијата на клубот е неизвесна, бидејќи клубот се соочува со огромна финансиска криза, па објавија дека не сакаат да играат со младинци против Портимонензе.
„Долг период играчите немаат добиено плата и не сакаат веќе да играат. Ние не сакаме да играме со фудбалери од младинскиот погон и со тоа да ја нарушиме регуларноста во првенството. Нема да патуваме во Портимао, иако сме свесни за последиците“, изјавија од таборот на Авеш.
За четири дена Авеш ќе и биде домаќин на Бенфика во меч што не одлучува ништо, но многу е спорно што не сакаат да играат против Портимонензе на 26. јули во последното коло.
Клубот од Портимао се бори за опстанок и ако екипата на Авеш не се појави на терен, Портимонензе ќе добие три бода на тацна што ќе им наштети на конкурентите Сетубал, Тондела и Белененшеш, кои исто така бијат битка за да го одбегнат 17. место кое води во Втората португалска лига.
На две кола до крајот Авеш со само 17 бода е веќе испаднат, а Портимонензе, Сетубал и Тондела имаат по 30 бода на делба на претпоследната позиција што исто така води во понизок ранг на натпревари. Белененшеш е во најдобра позиција со 32 бода во квартетот најзагрозени екипи во Примеира.