Оле Гунар Солскјер го прероди Манчестер јунајтед. Норвешкиот стратег го врати тимот на победнички патеки добивајќи ги двата меча на кои седеше на клупата. Интересно е што претходно само четворица тренери на Манчестер јунајтед имале две победи по ред откако биле назначени за тренери.
Тиџеј Вулрат, сер Мат Бизби, Дејв Секстон и неодамна отпуштениот Жозе Мурињо започнале со две победи по ред, а сега им се приклучи и Солскјер. Тој започна со победата од 5-1 на гости кај Кардиф, а вчера на свој терен беше подобар и од Хадерсфилд со 3-1. Иако вчера победи, Солскјер имаше забелешки на играта.
„Тоа не беше нашиот најдобро одигран меч. Малку бевме бавни во првите 20 минути, но потоа влеговме во ритам и дадовме три гола. Де Хеа во вистински момент имаше одлични интервенции и тоа многу ни помогна“, рече Солскјер.
Следниот предизвик за Солскјер и Манчестер е дуелот против Борнмут кој на 30-ти декември ќе се игра на „Олд Трафорд“.