Со трката за Големата награда на Австрија ќе се назначи стартот на новата сезона во Формула 1. По неколкумесечната неизвесност дали и во кој формат ќе почне сезоната, најбрзиот циркус најде начин како да се врати на програмата, а патеката „Ред бул ринг“ ќе ја има честа прва да ја трпи жештината на пневматиците и адреналинот.
Вчерашните тренинзи покажаа дека некои работи не се смениле. Како на пример, фаворитската улога во секоја трка и натаму му припаѓа на актуелниот светски првак Луис Хамилтон. Британецот со својата „сребрена стрела“, која за оваа сезона е префарбана во црно како поддршка за движењето „Црните животи се важни“, вчера беше најбрз на тренинзите, а веднаш зад него беше тимскиот колега Валтери Ботас.
Точно на пладне ќе се одржи последниот тренинг пред двете рунди квалификации кои се закажани за 15, односно 16 часот. Трката е закажана за утре со почеток во 15:10 часот.
