Тотенхем повеќе од едно полувреме беше со фудбалер плус на теренот, но тоа не беше доволно лондонскиот тим да слави на гостувањето кај Саутхемптон. Во меч од 20-тото коло, дуелот на „Сент Мери“ заврши нерешено, 1:1.
Иако Тотенхем не ги освои трите бода, тренерот на овој тим, Антонио Конте, испиша клупска историја. Италијанскиот стратег е првиот тренер во историјата на клубот кој нема ниту еден пораз во првите седум меча од првенството. Со Конте на чело, Тотенхем има четири победи и три нерешени.
По 17 одиграни меча, Тотенхем е на шестото место со 30 бодови, додека Саутхемптон досега освои 21 бод во 19 средби.
Вест хем не дозволи изненадување и лесно со 4:1 се радуваше на триумф на теренот на Ватфорд. Домаќините први дадоа гол и водеа со голот на Денис само по четири минути игра. Чеканите брзо се вратија од шокот и веќе до 30-тата минута имаа предност од 2:1, а во второто полувреме гостите постигнаа уште два гола.
Кристал палас имаше најлесна задача затоа што на свој терен го пречека „фенерџијата“ Норвич. Домаќините дадоа три гола уште во првото полувреме и потоа рутински ја задржаа предноста за нови три бода.
