Претседателот на Шпанската фудбалска федерација, Педро Роча, е суспендиран на две години од страна на Националниот спортски управен суд(ТАД). Портпаролката на ТАД ја потврди пресудата, но рече дека таа уште не е обврзувачка и може да биде оспорена во жалбена постапка, што според извештаите на шпанските медиуми, Роча планира да го направи.
Веста доаѓа три дена откако шпанските фудбалери ја освоија титулата европски првак во Берлин победувајќи ја Англија со 2:1 во финалето. Во извештаите се наведува дека Националниот спортски управен суд ја изрекол санкцијата во врска со отпуштањето на службениците на Федерацијата.
Судот смета дека Роча немал право на таа мерка како шеф на привремената комисија на РФЕФ по оставката на претходниот претседател Луис Рубијалес.
Роча наводно е казнет и финансиски со околу 33.000 евра поради други неправилности. Рубијалес поднесе оставка минатиот септември, откако ја бакна фудбалерката Џенифер Хермосо во уста без нејзина согласност при доделувањето на трофејот по завршувањето на Светското првенство на кое Шпанките ја освоија титулата.
Нему и уште на тројца обвинети ќе им се суди во февруари 2025 година поради аферата, а Рубијалес е под истрага и за корупција и перење пари за време на неговиот мандат како претседател на Фудбалската федерација на Шпанија.
