Украина има намера да поднесе апликација за да биде домаќин на Олимписки игри во 2028 или 2030 година, објавија на вебсајтот на претседателот Владимир Зеленски, но проблемот е што организаторот за Летните олимписки игри во 2028 веќе е познат, и тоа е Лос Анџелес.
На првиот човек на украинскиот олимписки комитет, Сергеј Бубка, му е дадена дозвола да почне да лобира. Предводникот на ИОК, Томас Бах, е поканет да дојде во Украина, и во таа прилика ќе му се покажат можностите на Украина да биде домаќин на најголемиот спортски настан.
Сепак, останува прашањето како заборавија дека терминот за ЛОИ во 2028 година е зафатен. Во септември 2017 година, Лос Анџелес беше избран за организатор. Ова значи дека евентуална шанса за Украина е 2030, кога треба да има Зимски олимписки игри.
