Баерн Минхен успеа да излезе како победник од лудата завршница на Бундеслигата, но тоа не го спаси главниот двоец задолжен за спортскиот дел, Оливер Кан и Хасан Салихамиџиќ, од отказ.
Почесниот претседател на Баерн Минхен, Ули Хенес, беше искрен и отворено зборуваше за отказот на легендарниот голман Оливер Кан.
„Кан е многу интелигентен човек и дискусијата со поранешниот голман беше забавна. Големото разочарување е што мислев дека може сам да ја заврши работата поради неговата личност, но наместо тоа тој се опкружи со своите советници. Тоа беше грешка. Во разговорот Кан вербално го нападна неговиот наследник Јан-Кристијан Дрисен. Затоа му беше препорачано да не патува во Келн за да избегне понатамошна ескалација. Сепак, јас имам голема почит кон него, тој постигна многу како играч. Дури и ако тој не ги оправда очекувањата како извршен директор, мојата врата е секогаш отворена за Оливер“, изјави почесниот претседател на Баерн Минхен.
