Македонскиот возач Ристо Вуков се врати од првата трка што ја возеше во Порше Суперкуп, за која вели дека била голема лекција за него. Вуков за првпат возеше на свиокливата патека низ улиците на Кнежевството, воедно промовирајќи се и како прв возач од Македонија што учествувал во трка која се вози на оваа локација.
„Имав само 10 круга тренинг во четвртокот, а потоа следуваше излетувањето во првиот круг од квалификациите. Ме понесе желбата да направам подобар резултат бидејќи квалификациите се клучни за секоја трка што се вози низ улиците на Монте Карло, што се должи на фактот дека нема многу шанси за престигнување. Сепак, она што сите го кажуваат е дека во природата на оваа патека е да биде сурова бидејќи нема зони за излетување и бариерите се премногу блиску до асфалтот, јас го научив на сопствена кожа. Стартував како последен и не сакав да направам уште една грешка бидејќи тимот направи сè што можеше за да го подготви автомобилот за трка. Нов инцидент ќе го комплицираше мојот следен тест на ‘Хунгароринг’ идната недела, па затоа единствена желба ми беше да го доведам автомобилот до целта без оштетувања. Својата шанса ќе ја барам во следните настапи“, вели Вуков.
