Фудбалската легенда на Андора, дефанзивецот Илдефонс Лима, постави светски рекорд по должина на играње за репрезентација. Тој дебито за својата земја го имаше 22 години и 148 дена пред мечот со Турција, кога играше по 126-ти пат за својата земја. Досега рекордер беше Иван Хуртадо од Еквадор со 22 години и 143 дена од првиот до последниот меч.
Не се знае дали Лима, кој наскоро полни 40 години, ќе се повлече од фудбалот или ќе игра и во квалификациите за СП 2022. Тој има и 11 гола за Андора, со што е рекордер.
Ахмед Хасан, кој е рекордер со 184 настапи за својата земја, играше „само“ 17 години за Египет. Од активните фудбалери, Серхио Рамос би можел да го стигне Хасан, бидејќи има 168. Кај головите, прв е Али Даеи со 109, а Кристијано Роналдо има десет помалку.
Инаку, Лима како најважни моменти ги кажа: дебито против Естонија во 1997 година, играњето против Бразил во 1998 кога за Кариоките играле Роналдо, Ривалдо и дружината, истата 1998 играа на првиот меч со Франција како актуелен светски првак, во 2009 настапи на „Вембли“ против Англија, кога се повлече неговиот брат Тони, и победата од 1-0 над Унгарија во 2017 година. Според Лима, тоа е најдобрата игра на Андора во нејзината историја.
Во 2004 година Андора дојде до првата победа во историјата на официјален меч, а нивна жртва беше македонската репрезентација. Како најдобри фудбалери против кои играл Лима ги наведе: Роналдо, Кристијано Роналдо, Фернандо Торес, Робин ван Перси и Андриј Шевченко.
