Џејмс Харден повторно блескаше во дресот на Хјустон. Ноќеска го потопи тимот на Јута џез со 47 поени и реализираше клучни поени во последните минути од средбата. Погоди две тројки, а потоа беше успешен од линијата за слободни фрлања, поени кои го решија дуелот во „Тојота центарот“.
Но, она што го направи Брадата пред да ги добие тие две слободни фрлања е апсурдно. Во изолација против Рики Рубио, Харден се обиде со „степ-бек“ да создаде простор за шут и направи очигледни чекори. Наместо да се досуди вистинската одлука, судиите свиреа фаул за Харден, иако еден од арбитрите беше во непосредна близина на Харден.
Пропустот на судиите Јута ја чинеше пораз, додека на Харден не му е прв пат да направи чекор повеќе и притоа да се извлече.
