Лионел Меси продолжува да ги восхитува фудбалските вљубеници. Петкратниот носител на Златна топка даде два гола во победата над Тотенхем во Лондон, во рамките на Лигата на шампиони. Со тие два погодоци, аргентинскиот феномен веќе десетта сезона по ред барем 40 пати ја тресе мрежата на противниците.
До крајот на годината, Меси би можело да одигра уште 14 мечеви со Барселона, на кои сигурно ќе го подобри контото. Серијата на Лео започна во 2009 година, кога даде 41 гол во сите натпреварувања. Најдобра година му беше 2012, кога постави светски рекорд. За тие 12 месеци постигна неверојатни 91 гол во сите натпреварувања. Тогаш даде 79 гола за Барселона во 60 средби, а во дресот на Аргентина погоди 12 пати во девет дуели. Имаше и 22 асистенции, што значи дека во 2012 година бил директен учесник во постигнување на 113 голови.
ГОЛОВИ НА МЕСИ ПО ГОДИНИ
2009 – 41 гол
2010 – 60 гола
2011 – 59 гола
2012 – 91 гол
2013 – 45 гола
2014 – 58 гола
2015 – 52 гола
2016 – 59 гола
2017 – 54 гола
2018 – 40 гола до овој момент
