Машката одбојкарска репрезентација на Македонија, своето второ учество на европските првенства ќе го почне во Финска. Денешната ждрепка за септемвриското ЕП, сакаше нашиот национален тим да се најде во групата Ц која ќе се игра во финскиот град Тампере.
Противници на Црвено-жолтите ќе бидат домашната Финска, Русија, Холандија, Турција и Шпанија. Групата можеше да биде и многу потешка, но играњето во далечната Финска не е баш поволно за нашите навивачи кои сакаат да го бодрат популарните Спартанци предводени од Никола Ѓорѓиев.
