Според најавите кои стигнуваат од Португалија, еден од најголемите таленти во светот Жоао Феликс во следната сезона ќе го носи дресот на Атлетико Мадрид. Тврдењата се дека 19-годишниот тинејџер веќе се наоѓа во Мадрид, каде што треба да го комплетира договорот.
За реализација на овој трансфер, Атлетико е подготвен да плати 120 милиони евра, колку што изнесува откупната клаузула на Феликс во Бенфика. Младиот Португалец блесна и минатата сезона заврши со 15 погодоци и девет асистенции во домашното првенство.
За него се интересираа повеќе европски гиганти, но многу веројатно е дека Атлетико ќе ја добие трката за овој талент и ќе постави нов клупски рекорд за потрошени пари за трансфер на еден играч. Феликс ги помина сите младински категории во португалската репрезентација, а за сениорскиот тим дебитираше на дуелите од Лигата на нациите.