Андре Гомес, фудбалерот на Евертон, беше успешно опериран по страшната повреда која ја доживеа на дуелот против Тотенхем. Португалецот заработи скршеница на глуждот на десната нога и на носилки, со болен израз на лицето, го напушти теренот.
Гомес беше директно пренесен во болница, а денеска беше извршена операцијата. Според најавите од Евертон, нивниот играч треба целосно да закрепне и по одреден период повторно да се врати на теренот.
„Евертон може да потврди дека Андре Гомес денеска беше на операција. Санирана е фрактурата и дислокацијата на глуждот на десната нога. Операцијата помина многу успешно. На Андре сега му претстои одреден период на закрепнување во болница, а потоаќе започне и рехабилитацијата под будното око на лекарскиот тим на Евертон. Очекуваме целосно закрепнување“, стои во соопштението на Евертон.
Гомес се повреди откако врз него стартуваше Сон Хеунг-мин, а потоа Гомес падна врз Орие и ја скрши ногата. Целата ситуација делуваше многу страшно, а дури и Сон, кој стартуваше над Гомес, не можеше да поверува што му се случи на Португалецот. Целата ситуација од повредата може да ја погледнете ТУКА.