Џејкоб Вајли кариерата ја продолжува во Будуќност. Американецот со македонски пасош е трето засилување за актуелниот јадранскиот вицепрвак ова лето каде што ќе игра под водство на Александар Џикиќ, поранешниот селектор на Македонија.
Вајли пристигна како слободен играч по раскинувањето на соработката со Гран Канарија. Нашиот крилен центар остатокот од минатата сезона го доигра како појзамен во редовите на Сарагоса, каде што бележеше просек од 10,4 поени во 19 настапи.
Неговиот ангажман на доста креативен начин го потврди суперагентот Мишко Ражнатовиќ со објава на „Твитер“:
„Уште од времето на поранешна СФРЈ, во овој дел од годината граѓаните на Македонија се упатуваат кон својата омилена туристичка дестинација, Црна Гора“, се огласи Ражнатовиќ.
Jos od vremena bivse SFRJ u ovo doba godine, gradjani Makedonije krecu ka omiljenoj turistickoj destinaciji, Crnoj Gori!#BeoBasket
— Misko4Raznatovic (@MiskoRaznatovic) July 2, 2021
Пред Вајли, во Подгорица пристигнаа Един Атиќ и Марко Јагодиќ-Курижа, додека Џикиќ беше ангажиран за старо-нов тренер откако Дејан Милојевиќ тренерската кариера ја продолжи во НБА, каде што ќе биде асистент на Стив Кер во Голден стејт.
