Очекувано, без никакви изненадувања, Ливерпул стигна до убедлива победа против Хадерсфилд, во првиот меч од 36. коло во Премиер лигата. Домаќинот на „Енфилд Роуд“ победи со убедливи 5:0, а интересно е што „отпорот“ на гостите траеше само 15 секунди.
По првиот судиски свиреж, гостите згрешија, а Кеита го постигна најбрзиот погодок во историјата на Ливерпул, во Премиер лигата. Тоа беше само најава дека домаќините ќе стигнат до лесен и убедлив триумф. До крајот на првото полувреме погодија Мане и Салах за убедливи 3:0. Во второто полувреме уште по еден гол за двајцата напаѓачи и на крајот убедливи 5:0.
Салах на овој меч стана само третиот играч на Ливерпул во историјата, кој успеал две сезони по ред да даде 20+ погодоци. Претходно тоа им успевало на Роби Фауел (сезони 1994/95 и 1995/96), како и на Луис Суарес во сезоните 2012/13 и 2013/14.
Хадерсфилд го продолжи постот да неуспее да постигне гол во дуелите со Ливерпул. Овој „пост“ трае веќе девет меча, а последен пат Хадерсфилд погодил против Ливерпул на меч од втората лига одигран во далечната 1962 година, кога дуелот во април завршил 1:1.
По оваа победа, ливерпул повторно е лидер во Премиер лигата со 91 бодови, додека Манчестер сити остана на 89 бодови, но и меч помалку, што значи дека „граѓаните“ се во ситуација во која сами треба да си решат дали ќе ја одбранат титулата или ќе му ја препуштат на Ливерпул.