Во исчекување на миланското дерби на „Џузепе Меаца“, се огласи и ексфудбалерот на „нероаѕурите“, Марко Матераци, кој ја искористи приликата да го пофали новиот фудбалер на Интер, Раџа Наинголан. Пензионираниот Италијанец смета дека Наинголан е клучен играч за тимот на Спалети, а неговата игра го потсетува на неговиот некогашен колега, Дејан Станковиќ.
„Наинголан во Интер е она што некогаш беше Дејан Станковиќ. Краде топки, започнува контранапади, дава голови, како лав се бори на теренот“, вели Матераци.
Дербито Интер – Милан е закажано за утре, со почеток во 20.30 часот.
Аријан Адеми го постигна првиот гол сезонава за Динамо Загреб, трет по ред во победата од 4:1 против Истра во Пула.
Нашиот репрезентативец одлично реагираше по долгата акција на гостите и со глава ја затресе домашната мрежа.
Адеми имаше проблеми со повреди, но се врати и во составот со национално обележја на Македонија, а игра стандардно и за Динамо, екипа која е лидер во ХНЛ и прв фаворит за титулата.
https://www.youtube.com/watch?v=IHsZanMvxBc
Атлетико Мадрид не успеа да го победи Вилјареал во едно од двете дербија денеска во Ла Лига, иако имаше предност од 1:0 на гостински терен.
Популарната „Жолта подморница“ не потона и по негативата и со голот на Марио Гаспар освои еден бод. Претходно Фелипе Луис му донесе предност на Атлетико.
Во Англија, Ливерпул продолжи сигурно да гази и со победа од 1:0 против Хадерсфилд се израмни на врвот на табелата со Манчестер сити. Двете екипи имаат по 23 бода.
Вердер ја продолжи супер серијата и со 2:0 го победи Шалке 04 во Гелзенкирхен. Тимот од Бремен има 17 бодови на второто место, зад лидерот Борусија Дортмунд со 20.
Иван Тричковски се врати на терен по повредата и одигра цел меч за АЕК Ларнака, што е добра вест и за нашата репрезентација.
Напаѓачот на македонската репрезентација се повреди кога беше во гол-форма и не настапи за А селекцијата на дуелот со Ерменија што го загубивме со 0:4 во Лигата на Нации, но сега е фит и се очекува да биде подготвен за ноемврискиот блок на натпревари против Лихтенштајн на гости и со Гибралтар дома.
АЕК со 3:0 ја победи Докса и без пораз се проби на третото место во кипарското првенство. Клубот од Ларнака има 10 бодови и меч помалку од водечкиот двоец Аполон и АЕЛ. Даниел Мојсов не играше денеска за АЕК.
Чавдар Костов и Кирил Николовски беа кошаркарите кои не дозволија Работнички да биде изненаден од Кожув. Средбата во „Градски парк“ заврши со 102:75 за домашните кои имаат три победи по првите три кола.
Бугаринот Костов даде 29 поени (погоди шест тројки), а Николовски придонесе со 26 поени и шест скока. Гевгеличани беа рамноправни во првото полувреме бидејќи играа ефикасно, а потоа веќе не постигнуваа толку поени, додека Работнички продолжи во ист стил и разликата од минута во минута растеше.
За да не биде сè така црно за гевгелиските љубители на кошарката, се погрижи Блокотехна, која го надигра Пелистер со 97:69, и заедно со Работнички се на врвот со по 6 бода. Разликата во квалитет беше видлива уште во првата четвртина, а Блокотехна тоа го потврди и во наредните 20 минути, па финишот беше само формалност.
Бразилецот Даниел Беса со гол во 67. минута и донесе голем бод на Џенова и ја прекина серијата од 8 победи на шампионот Јувентус во новата сезона во Серија А.
Гостите приредија сензација против неприкосновениот лидер во Калчото, а капитенот на македонската репрезентација Горан Пандев имаше придонес во подвигот. Одигра десетина минути во финишот, доби и жолт картон, но и се радува на ремито 1:1.
Јувентус поведе со голот на Кристијано Роналдо по 18. минути игра, но потоа прими гол, само шести во шампионатот и не успеа да стаса до девет од девет.
Пелистер лесно и убедливо го победи Радовиш со 40:28 во деби мечот за новиот тренер Јошко Петковиќ. Тој се врати на клупата на битолчани, а играчите му овозможија да се радува на убедлив триумф.
Мечот беше решен уште по првото полувреме, кое Пелистер го доби со 21:14, а до крајот разликата порасна за уште пет голови.
Крилото на домаќините Милан Поповиќ беше најефикасен со 11 голови.
ПСЖ рутинирано го победи Амиен со 5-0, за 10-та победа во низа во францускиот шампионат, од исто толку натпревари. „Светците“ настапија без најскапиот фудбалер на светот, Нејмар, но и без него, избраниците на Тухел немаа проблеми во освојувањето на нови три бода.
Маркињос го отвори резултатот по само 12 минути игра по асистенција на Ди Марија, а Аргентинецот одново беше креатор на нов гол за домаќините, овој пат му намести на Рабио во 42-та минута од мечот. Дракслер на десетина минути пред крајот зголеми на 3-0, две минути подоцна во листата на стрелци се запиша и Мбапе, а „петардата“ пукна со голот на Диаби во 88-та минута.
ПСЖ останува максимален по 10 кола во француското првенство со 30 освоени бодови, и веќе има двоцифрена бодовна предност во однос на второ пласираниот Лил.
МЗТ Скопје Аеродром без поголеми проблеми дојде до својата прва гостинска победа сезонава, славеше со 102:72 против Вардар, клубот од кој во МЗТ дојде тренерот Ѓорѓи Кочов. Ова беше прв меч за Кочов како тренер против „црвено-црните“, клуб во кој ја заврши и играчката кариера.
До 14 минута, домашните беа рамноправни, имаа 32-33, а потоа МЗТ со серија од 13-0 отиде на плус 14, и го деморализираше противникот. Во третата четвртина, „штрковите“ заиграа на посакуваното ниво и направија предност од дури 30 поени разлика, па финишот беше само рутина.
Колото требаше да почне со дуел на Шкупи и Фени индустри, но средбата беше одложена, бидејќи во салата „Шабан Трстена“ не била направена потребната реконструкција на соблекувалните за официјалните лица и тимовите.
Чаирчани поставија монтажни тунели од соблекувална до терен, но другите технички обврски не ги исполниле и делегатот не дозволи да се игра. Шкупи има рок од 24 часа да ги среди проблемите, а новиот термин за одигрување на дуелот е утре од 13 часот.
Спорт Манија е портал наменет за љубителите на спортот кој почна со работа на 14 септември 2018 година.
Контакт: contact@sportmanija.mk
Спорт Манија © 2018-2023
