Челзи со убедливи 4-0 триумфираше над ПАОК за петта победа во Лигата на Европа. „Сините“ и пред овој меч обезбедија место меѓу шеснаесетфиналистите, но избраниците на Маурисио Сари со стил го потврдуваат првото место во групата Л.

Жиру на два пати ја тресеше мрежата на гостите, во 27-та и 37-та минута, младиот Хадсон-Одои го постигна својот првенец во дресот на Челзи во 60-тата, додека Мората ги постави конечните 4-0 во 78-та минута.

Ајнтрахт Франкфурт го декласираше тимот на Марсеј со 4-0. Германскиот состав ја запиша петтата победа, односно 15-от бод, па и тие ќе презимат во Европа. Марсеј со четвриот пораз во групата Х остана закован на дното само со еден бод.

Два гола беа дело на младиот Лука Јовиќ, додека фудбалерите на Марсеј си постигнаа два автогола и практично сами придонесоа за новиот пораз.

Севилја со минимални 1-0 загуби на гостувањето кај Стандард Лиеж, па Андалузијците сега се во незавидна ситуација по пет меча. Џенепо со гол во 62-та минута му го донесе третиот триумф на Стандард, па сега овие две екипи имаат по девет бода, а Севилја пласман во следната рунда ќе бара преку лидерот Краснодар од групата Ј.

Резултати Лига на Европа: 

Челзи – ПАОК 4-0

Ајнтрахт Франкфурт – Марсеј 4-0

Аполон – Лацио 2-0

Стандард Лиеж – Севилја 1-0

Јаблонец – Рен 0-1

Малме – Генк 2-2

Глазгов ренџерс – Вилјареал 0-0

Сарпсборг – Бешикташ 2-3