Дома Blog Страница 11

Поранешниот шампион на Англија испадна во Третата лига точно по 10 години откако ја освои титулата (Фото)

Павле Симовски
-
0
Поранешниот шампион на Англија испадна во Третата лига точно по 10 години откако ја освои титулата (Фото)

Фудбалерите на Лестер и Хал сити синоќа ремизираа во 44-тото коло од англискиот Чемпионшип, а конечниот резултат беше 2:2, па така поранешниот шампион на Англија испадна во третиот ранг на англискиот фудбал – Лига 1.

Тоа се случи точно 10 години откако Лестер ја испиша најубавата приказна во англискиот фудбал и ја освои титулата во Премиер лигата, иако никој не им даваше шанси за тоа пред почетокот на сезоната.

Шампионот на Англија од сезоната 2015/2016, на две кола пред крајот се наоѓа на 23-тото место со 42 освоени бода, додека Блекбурн роверс, кој е во безбедната зона, има 49, па јасно е дека Лисиците ниту теоретски не можат да ги стигнат.

Кога беше означен крајот на натпреварот, на теренот се случија многу емотивни и тажни сцени. Навивачите беа потресени, а имаше и такви кои завршија во солзи знаејќи дека следната година ќе играат дури во третиот ранг.

Ноќ на изненадувања во НБА-лигата: Победија сите аутсајдери! (Видео)

Павле Симовски
-
0
Ноќ на изненадувања во НБА-лигата: Победија сите аутсајдери! (Видео)

Изненадувачка ноќ во НБА-лигата откако аутсајдерите победија на сите три меча од плејофот. Најмногу профитирапе ЛА лејкерс, па сега има 2-0 предност против Хјустон.

Езерџиите го добија и вториот меч, овојпат со 101-94, а Леброн Џејмс со 28 поени беше најефикасен на паркетот. Четириесет и едногодишната легенда додаде и осум скока и седум асистенции.

Серијата помеѓу Бостон и Филаделфија сега е израмнета на 1-1 откако „76-ките“ победија на гости со 97-111. Сличен расплет имаше и дуелот на Сан Антонио и Портланд откако гостите стигнаа до израмнување на 1-1 со победа од 103-106.

Мбапе и Винисиус донесоа триумф за Реал (Видео)

Никола Ѓуровски
-
0
Мбапе и Винисиус донесоа триумф за Реал (Видео)

Реал Мадрид го совлада Алавес со 2-1 на „Сантијаго Бернабеу“, со што конечно стави крај на серијата лоши резултати и ја запиша првата победа во април по четири последователни кикса.

Кралскиот клуб дојде до предност во 30-тата минута, кога Килијан Мбапе погоди со доза на среќа, совладувајќи го голманот Сивера.

Лоша вест за домаќините беше повредата на Едер Милитао, кој пред крајот на првото полувреме мораше да го напушти теренот, а на негово место влезе Антонио Рудигер.

Прашањето околу победникот практично беше решено во 50-тата минута, кога Винисиус јуниор постигна спектакуларен гол од далечина од околу 25 метри, зголемувајќи на 2-0.

Алавес успеа само да го ублажи поразот во судиското продолжение преку Тони Мартинес, но без реална шанса за пресврт.

Со оваа победа, Реал Мадрид стигна до 73 бода и остана на втората позиција во Ла Лига, додека Алавес е 17-ти со 33 бода.

Во друг натпревар, Бетис славеше драматична победа од 2-3 на гостувањето кај Жирона.

Жирона поведе преку Виктор Циганков, но Марк Рока израмни пред паузата.

Во вториот дел следуваа пресврти: Абде Езазули донесе водство за Бетис, Азедин Унахи израмни од пенал, а конечниот погодок за 2-3 го постигна Родриго Рикелме.

Бетис се искачи на петтото место со 49 бода и доби дополнителен импулс со враќањето на Иско, додека Жирона остана на 11-тата позиција со 38 бода.

Интер со голем пресврт го елиминира Комо и обезбеди финале во Купот на Италија (Видео)

Никола Ѓуровски
-
0
Интер со голем пресврт го елиминира Комо и обезбеди финале во Купот на Италија (Видео)

Интер се пласира во финалето на Купот на Италија откако на домашен терен го совлада Комо со 3-2 во натпревар исполнет со пресврти.

Екипата предводена од Сеск Фабрегас започна храбро и без респект кон фаворитот, создавајќи неколку сериозни закани уште во првиот дел. Гостите го шокираа Милано во 32-рата минута, кога Мартин Батурина погоди по асистенција на Ван дер Бремпт, со помош на стативата, за 0-1.


Интер се обиде да возврати преку Маркус Турам, но на полувреме резултатот остана непроменет.

Само три минути по стартот на второто полувреме, Комо ја удвои предноста. Лукас да Куња реализира по одлична асистенција на Нико Паз и ги замолкна навивачите на „Меаца“.

Интер реагираше со измени, што целосно го промени текот на натпреварот. Во игра влезе Петар Сучиќ, кој веднаш внесе енергија и учествуваше во акцијата за намалување на резултатот. Во 69-тата минута Хакан Чалханоглу погоди за 1-2.

Интер постепено ја презеде контролата и во 86-та минута дојде до израмнување, кога Чалханоглу со глава погоди за 2-2, по уште една асистенција на Сучиќ.

Само три минути подоцна следуваше целосен пресврт. Сучиќ одигра извонредна акција со Чалханоглу и со прецизен удар го совлада противничкиот голман, носејќи конечни 3-2 и пласман во финале за Интер.

Во завршницата се истакна и голманот Јан Зомер, кој со неколку клучни интервенции го зачува водството на домаќините.

Интер во финалето ќе се сретне со подобриот од дуелот меѓу Аталанта и Лацио.

Брајтон го декласира Челзи (Видео)

Никола Ѓуровски
-
0
Брајтон го декласира Челзи (Видео)

Челзи доживеа тежок пораз на гостувањето кај Брајтон со 0-3, резултат што дури и не ја отсликува целосно доминацијата на домаќините.

Натпреварот започна лошо за Сините од Лондон. Веќе во третата минута, Каору Митома се најде во одлична шанса, но Роберт Санчес интервенираше и го спаси својот тим.


Сепак, по изведениот корнер, Челзи капитулира. По голема дезорганизација во одбраната, Јан Пол ван Хеке погоди за 1-0.

Во продолжението, Брајтон постојано создаваше простор и лесно влегуваше во шеснаесетникот на гостите, додека Челзи делуваше неорганизирано и без јасна идеја. Домаќините имаа уште неколку шанси да ја зголемат предноста, а Санчес повторно беше на тест.

Во 56-тата минута Брајтон го удвои водството по одлична акција, Џорџинио Рутер асистираше, а Карлос Балеба погоди за 2-0.

До крајот, Челзи не успеа да се врати во игра, а конечниот удар дојде во судиското продолжение, кога Дени Велбек го искористи својот момент и постави конечни 3-0 за убедлива победа на Брајтон.

Панатинаикос обезбеди плејоф во Евролигата, Црвена ѕвезда загуби во плејин

Никола Ѓуровски
-
0
Панатинаикос обезбеди плејоф во Евролигата, Црвена ѕвезда загуби во плејин

Панатинаикос обезбеди пласман во евролигашкиот плејоф откако на домашен терен го совлада Монако со 87-79.

Грчкиот гигант ја изгради победата уште во првото полувреме, кое го заврши со убедлива предност од 49-34. Иако во продолжението Детелинките паднаа во ритам и ги загубија последните две четвртини, стекнатата залиха се покажа како доволна за да се одбие обидот за пресврт на гостите.

Една од клучните фигури во триумфот беше македонскиот репрезентативец Ти Џеј Шортс, кој блесна со 21 поен и беше најефикасен во редовите на Панатинаикос. Добра поддршка пристигна и од Кенет Фарид, кој додаде 13 поени.

Кај Монако најистакнат поединец беше Мајк Џејмс, кој постигна 25 поени, но неговиот учинок не беше доволен за целосен камбек.

Во следната фаза од натпреварувањето, Панатинаикос ќе се соочи со Валенсија Баскет во четвртфиналето, каде што грчкиот тим ќе се обиде да ги продолжи своите високи амбиции во Евролигата.

Црвена ѕвезда е елиминирана во плејин фазата на Евролигата откако беше поразена од Барселона со 80-72 во „Блауграна“.

Барселона на полувреме водеше со 47-33, а во третата четвртина стигна и до „+22“, што практично ја реши победата. Црвена ѕвезда успеа да реагира и да намали дел од разликата преку Тајсон Картер и Семи Оџејеле, но немаше доволно сили за целосен пресврт.

Најефикасен во редовите на Ѕвезда беше Милер-Мекинтаер со 19 поени, а Џеред Батлер додаде 16. Кај Барселона, Пантер и Клајбурн завршија со по 22 поена и беа клучни за триумфот на каталонскиот тим.

Артета си бендиса засилување од Реал Мадрид

Никола Ѓуровски
-
0
Артета си бендиса засилување од Реал Мадрид

Менаџерот на Арсенал, Микел Артета, во својот фокус го има левиот бек на Реал Мадрид, Алваро Карерас. Топчиите веќе стапиле во контакт со претставниците на шпанскиот дефанзивец, а Артета е подготвен да му даде клучна улога во проектот на Арсенал во наредните сезони.

Договорот на 23-годишниот лев бек со Реал Мадрид трае до 2031 година, што претставува сериозна пречка за евентуален трансфер. Интерес за Карерас има и од Манчестер јунајтед, Јувентус и Наполи, а неговата пазарна вредност изнесува околу 60 милиони евра.

Од почетокот на сезоната, Карерас има одиграно 37 натпревари за Реал Мадрид, постигнувајќи два гола и две асистенции.

Дибала сака да остане во Рома, дури и за помала плата

Никола Ѓуровски
-
0
Дибала сака да остане во Рома, дури и за помала плата

Пауло Дибала се надева дека ќе го продолжи договорот со Рома и ќе остане во клубот и следната сезона и покрај понудите од Аргентина и Турција, пишува „Кориере дело спорт“.

Аргентинецот веќе три месеци закрепнува од повреда, но се надева дека ќе биде подготвен за натпреварот против Болоња. До истекот на неговиот договор со Рома остануваат уште околу 70 дена, а сè уште нема конечна одлука дали ќе остане на „Олимпико“ и следната сезона.

Сепак, и покрај интересот од странство, фудбалерот е решен да остане и е подготвен да прифати значително намалување на платата, во замена за бонуси поврзани со неговите настапи. Тоа би можело да биде клучен чекор кон постигнување нов договор и задржување на „Ла Хоја“ во редовите на Рома.

Во меѓувреме, уште еден офанзивен играч на Волчицата, Стефан Ел Шарави, ќе го напушти клубот по истекот на договорот летово. Меѓу заинтересираните за негов ангажман како слободен агент е и неговиот поранешен клуб Џенова.

Коби Мејну уште пет години ќе остане на „Олд Трафорд“

Никола Ѓуровски
-
0
Коби Мејну уште пет години ќе остане на „Олд Трафорд“

Играчот за врска на Манчестер jунајтед, Коби Мејну, постигнал договор за нова соработка со клубот, пренесуваат повеќе релевантни медиуми од Англија. Фудбалерот ќе потпише петгодишен договор со плата од 150.000 фунти неделно, што е околу четирипати повеќе од неговата сегашна заработка.

Ова претставува значаен потег за клубот од „Олд Трафорд“, кој подолго време водеше преговори со цел да ја обезбеди иднината на еден од своите најперспективни млади играчи. Се очекува продолжувањето на договорот официјално да биде објавено по завршувањето на сезоната.

Ова е импресивен пресврт во ситуацијата на Мејну, кој добиваше многу ограничена минутажа кај поранешниот менаџер Рубен Аморим. Токму тоа доведе до бројни шпекулации дека би можело да го напушти клубот уште во зимскиот преоден рок. Сепак, околностите драстично се променија по доаѓањето на Мајкл Карик.

Под водство на привремениот менаџер, Мејну брзо се наметна како еден од клучните играчи во тимот и повторно ја зацврсти својата позиција. Новиот договор е јасен показател дека на „Олд Трафорд“ сериозно сметаат на него и планираат иднината на Манчестер јунајтед да ја градат околу својот младинец.

Свечено е отворено Светското првенство во ракомет за ученици (Фото+Видео)

Златко Јуруковски
-
0
Свечено е отворено Светското првенство во ракомет за ученици (Фото+Видео)

Плоштадот „Македонија“ во Скопје беше местото каде што во стилот на отворањата на Олимписки игри, свечено беше отворено Светското првенство во ракомет за ученици, настан на кој нашата земја првпат е во улога на организатор и домаќин.

На првенството ќе настапат 20 земји од целиот свет во машка и 16 во женска конкуренција, со повеќе од 700 учесници кои дефилираа на плоштадот минувајќи од едната на другата страна на Камениот мост.

На отворањето говори одржаа Елена Мицковска (претседателка на Федерацијата на училиштен спорт на Македонија), Жељко Танасковиќ (претседател на Светската федерација на училиштен спорт), министерот за спорт, Борко Ристовски, градоначалникот на Скопје, Орце Ѓорѓиевски, и претседателката на Македонија, Гордана Силјановска-Давкова, која и свечено го прогласи првенството за отворено.

Сите истакнаа дека овој настан не е само спортски, туку и како мост за поврзување, прилика за дружба и стекнување искуство кое ќе го паметат цел живот.

Натпреварите почнуваат утре. Машката селекција на Македонија утре од 10.30 часот во салата „Македонско сонце“ во кругот на ОУ „11 Октомври“ во центарот на Скопје игра со Бугарија, а женската репрезентација има дуел со Белгија, исто така од 10.30 часот во салата „Крсте Мисирков“ во Гази Баба.

1...101112...10.755Страна 11 од 10.755