Македонската фудбалска репрезентација не успеа да стигне до историски прв пасман на Светското првенство. Вторпат по ред нашиот сон згаснува во баражот за пласман на планетарниот собир. Данска беше препреката која не можевме да ја поминеме откако загубивме со 4:0 во Копенхаген. Потоа, во дуел на поразените од баражот, нашата репрезентација одигра 0:0 во Даблин против Ирска и првпат во четирите гостувања во овој град останавме непоразени.
Поради неуспехот да се пласираме на Светското првенство, лидерите на македонската репрезентација на теренот, капитенот Енис Барди и ѕвездата од Наполи, Елиф Елмас, најавија дека дуелот во Даблин беше последен за нив во репрезентативниот дрес. Двајцата беа столбот во играта на нашиот национален тим и секако тоа ќе биде голем удар за селекторот Гоце Седлоски.
Барди повеќе од две години е капитен на Македонија и досега има 82 настапи и дури 20 гола за нашата селекција. Елмас зад себе има 77 мечеви во репрезентативниот дрес и има постигнато 13 гола.
За оние кои заборавија, денеска е 1 април, денот на шегата, денот кога се кажуваат и лажги, па едноставно во светот на спортот, каде што најактуелни се настапите на фудбалската репрезентација на Македонија, нормално беше да се „здрма нацијата“ со една фудбалска првоаприлска вест.
Барди и Елмас се двајцата фудбалери кои низ годините покажаа дека секогаш се тука за Македонија да помогнат и веднаш се подготвени на сите повици да одговорат на зададените задачи, без разлика кој е селекторот. Едноставно, тие покажаа дека се вистински професионалци, кои никогаш не ги штеделе силите за да донесат радост на македонските навивачи.
И, секако, фактот дека нема да играме на СП 2026 најмногу ги боли фудбалерите. Тие сигурно имаа најголема желба да победат и во Данска и каде и да требаше потоа да играат за да донесат настап на Македонија на историско прво Светско првенство.
Барди има 30 години, Елмас е уште помлад и има 26 години, што значи дека само да ги послужи здравјето, да ги избегнат повредите, и тие двајцата уште долго време ќе бидат дел од репрезентацијата на Македонија и на теренот ќе водат битки со сите противници, и тоа со единствена цел, да им донесат радост на сите македонски навивачи и секако останува желбата за настап на уште некое големо натпреварување.
Оваа првоаприлска рубрика ја воведовме од пред неколку години, па би било добро да се потсетиме дека во 2022 година ја испративме Македонија на Светското првенство во Катар затоа што Иран беше суспендиран. Интересно е дека и сега, четири години подоцна, ситуацијата е иста. Македонија беше елиминирана во баражот, а уште во „воздух виси“ настапот на Иран на Мундијалот.
Следната 2023 година, на 1 април го „донесовме“ Новак Ѓоковиќ во Македонија. Најдобриот тенисер на сите времиња во нашата земја има голем број фанови, но никогаш не бил во посета тука. Освен со текстот пред точно три години кога „дојде во Македонија“, уште чекаме Ноле да дојде во посета на соседската земја.
На 1 април 2024 година повторно најактуелни беа случувањата во репрезентацијата на Македонија. Тогаш имаше големи негодувања од навивачите околу тоа дали тогашниот селектор Благоја Милевски треба да си замине од функцијата или не, па решивме да „им ја исполниме желбата“ на фановите и напишавме дека Милевски си поднел оставка. Секако, тоа не се случи, а селекторот коректно го одработи својот договор до крајот и ја одведе Македонија до баражот за СП 2026.
Минатата година, „мета“ ни беше Кирил Лазаров. Точно пред 365 дена најактуелен беше настапот на ракометниот клуб Алкалоид на меѓународната сцена, кога и успеа да го освои трофејот во ЕХФ купот, а ние најавивме дека Лазаров освен како тренер, ќе се реактивира и како играч да помигне да се стигне до трофејот. На крајот, Алкалоид го освои пехарот.
Нека е среќен 1 април, денот на шегата.
