Репрезентациите на Босна и Херцеговина и Чешка се последните кои обезбедија место на Светското првенство во САД, Канада и Мексико. Двете селекции ќе одат на планетарниот собир, откако по подобор изведување на пеналите ги елиминираа Италија и Данска.
Италија поведе со голот на Мозес Кен во 15-тата минута, но Аѕурите потоа останаа со фудбалер помалку по исклучувањето на Бастони. Босна и Херцеговина во второто полувреме со сите сили тргна да израмни и тоа се случи во 79-тата минута, кога погоди Табаковиќ. Потоа немаше погодоци во дополнителните 30 минути, па пеналите решаваа.
Уште во првата серија Еспозито промаши за Италија, а потоа и Кристанте не беше прецизен. Сите четворица изведувачи на пеналите во селекцијата на БиХ беа прецизни за историска победа со 4:1 во „рулетот“.
Чешка и Данска одиграа 2:2 по 120 минути игра. Чесите водеа со 1:0 само по три минути игра, но Данска израмни во 72-рата минута, па мораа да се играат продолженија. Во дополнителните 30 минути Крејчи погоди за 2:1 за Чешка, а Хог израмни на 2:2 во 111-тата минута, најавувајќи ги пеналите.
Во пенал-серијата, Чесите психолошки беа постабилни. Тие и во полуфиналето на свој терен на пенали ја елиминираа Ирска, а сега беа подобри и од Данска, и тоа со 3:1. Данците промашија три од четирите пенали, додека Чесите погодија три од четири шута и на крајот се радуваа на пласман на Светско првенство.
