Алескандар Васоски има прекрасен почеток на кариерата како главен тренер, со својот омилен клуб Вардар гази сè пред себе и нема пораз во новата сезона од домашното првенство.
Завчера популарното Тетовче тактички го надмудри Ѓоре Јовановски, многу поискусниот колега на клупата на Работнички, а Вардар го доби соседското дерби со 2-0.
„Одигравме како по ноти. Сè што договоривме пред мечот, го спроведовме на терен. Работнички подобро влезе во мечот, но моите играчи беа супер мотивирани, борбени, квалитетни и според мене, заслужено се радувавме на победата. Иако имаме доста промени во тимот во однос на ланската сезона, играме добро, а резултатите се награда за вложениот труд. Вардар на некој начин е чудо и над сите проблеми, кои верувам наскоро ќе бидат надминати. Наше е да продолжиме максимално посветено, да работиме и да го продолжиме континуитетот на добри игри и резултати“, вели Васоски за СПОРТ МАНИЈА.
Некогашниот играч на Бундеслигашот Ајнтрахт Франкфурт од утре ќе биде засилување на СПОРТ МАНИЈА со своите предлог-типови и анализи на случувањата во германското првенство.
Од 2005 до 2011 година Васоски играше за Ајнтрахт, прво во популарната „Цвајта“, а потоа и во Бундеслигата. И тоа во период кога во најсилната германска лига играа екстра клвалитетни напаѓачи од калибарот на Мирослав Клозе, Марио Гомес, Аилтон, Џовани Елбер, Кевин Курањи… сите во топ 50 најдобри стрелци во историјата на Бундеслигата.
Читајте „Спортманија“ и очекувајте ја стручната анализа и предлог-типови на Васоски на нашите страници за петтото коло во Бундеслигата, кое на програмата е утре и задутре.
